مسلسل يومي .. (قهوة المحطة)

محطة قطر متهالكة , حاضنة في زاوية جواها قهوة بلدي عتيقة .. فايح منها ريحة البن المحروق ودخان السجاير.
 تحس مع كل نظرة تامل فيها بتوقف الزمن عند مرحلة معينه في القرن البائد.. من اول مفارش الترابيزات بنقشتها الغريبة .. لاعلان شاي العروسة الكبير فوق الباسطة.. للراجل الصعيدي بخشبة تلميع الجزم اللي محتل ركن مفارقوش من يوم ماحطيت رجلي في المحطة لاول مرة٠٠

 عينات واطياف مختلفة من البشر كل واحد بطل في قصة حياة ومعاناه يومية .. مختلفين ومتباينين في افكارهم وهمومهم ومتفقين على استقبال يوم جديد من على نفس المنبر.

وكيل النيابة .. ببدلته الشيك والنضارة الشمس .. مع نفس فنجان القهوة , والاهرام اليومي  و السيجارة المارلبورو ..

كمسري القطر بالبدله الزرقا وساندوتشات الفول وربطة الجرجير اللي تعتبر جزء من شخصيته متفوق في حس الضيافة والكرم .. بيلف يعزم يوميا بوجبة فطاره على كل الناس في القهوة وعمري ماشفته زهق في مدة سنتين قضيتهم وسط المكان ده ..
مندوب مبيعات لشركة ادوية او عطور (" زي ماوصلني تخميني") لنوع المنتجات اللي بيشلها في الشنطة الجلد الدايبة الي مابتفارقهوش..

بياعين متنقلين مع بضايعهم، موظفين وطلبة جامعة مافيش بنهم اي رابط مشترك غير المكان ..وكانهم متفقين انهم يبدؤا رحلة كفاحهم اليومي من البقعه دي.

كتير كنت بستغرب من كمية التمثيل ل "القهوة المصرية " في الرويات وابداعات الادباء المصريين والاجانب وقد ايه هي منبع الالهام عندهم و صورة حية مصغرة او نقدر نقول خريطة ممثلة لاطياف الشعب المصري ، ومع تواجدك فيها وترددك عليها لمده كبيرة تكتشف فعلا وتحس بنوع من الامان النفسي .. والانتماء للجو .. والعتق الزمني جواها .

#معايشة